Ǵylymı jobanyń jetekshisi Baǵdat Satybaldıevtiń aıtýynsha, qondyrǵy energııa kózderine táýeldi emes, sondaı-aq shóldi aımaqtarda qoldanýǵa óte yńǵaıly.
«Qondyrǵy elimizde alǵash ret jasalyp otyr. Atalǵan qondyrǵynyń kómegimen 300-ge jýyq synama alýǵa bolady. Germanııa, AQSh jáne basqa memleketterde bul qondyrǵynyń analogtary bar. Biraq olar elektr togy arqyly jumys isteıdi. Al bizdiń ónim energııa qýatynsyz jáne aımaqtardaǵy ózgeristerge qaramastan jumys isteı beredi. Bul sý synamalaryn alý jumysyn áldeqaıda jeńildetedi», deıdi joba jetekshisi.
Atalǵan qondyrǵyny oqý ordasynyń ǵalymdary Syrdarııadaǵy sý sapasyn zertteýge jáne anyqtaý jumystaryna qoldanǵan. Nátıjesinde ózen sýynyń quramynan hlor, organıkalyq pestısıdter, fýngısıdter jáne gerbısıdter anyqtalǵan.
Búgingi tańda ınnovasııalyq jobaǵa patent alý jumystary júrip jatyr. Synama alýdyń prototıpi AQSh-ta synaqtan ótip jatyr. Testileýden sátti ótkennen keıin ýnıversıtet ǵalymdary qondyrǵyny kommersııalandyrý maqsatynda naryqqa shyǵarýdy kózdep otyr.
